尼馬可以復操　仲換埋贊助

足球博彩神器，每日重心提供盡在《彩報》：http://win.on.cc/football/　

法甲勁旅巴黎聖日耳門(PSG)球星尼馬喺社交網宣布，自己已經復操，意味呢位早前感染新冠肺炎嘅巴西前鋒已經康復，對於有多位球員「中招」嘅PSG而言，絕對係一場及時雨。

PSG早前一度有7位球員確診新冠肺炎，包括尼馬、基利安麥巴比、莫路伊卡迪、迪馬利亞、里安度柏利迪斯、馬昆奴斯哥利亞、基羅拿華斯。PSG上場聯賽缺少呢7位主力之下，0比1不敵新升班球隊朗斯，打擊非常大。

巴黎聖日耳門將於下周一(14日)凌晨聯賽惡鬥死敵馬賽，如果尼馬可以復出，或者可以幫助到球隊「止血」。

與此同時，尼馬正式宣布換贊助，與nike長達15年合作結束，改與PUMA合作，仲喺社交網站上載影片同公告，宣布自己「換鞋」；至於新贊助商就將尼馬同一班昔日球王例如比利、馬納當拿、尤西比奧、告魯夫等巨星相提並論。