新兵開胡華迪起孖 狐狸大炒西布朗

2020年09月13日 23:00
東網電視
更多新聞短片
占美華迪起孖(Getty Images)
足球博彩神器,每日重心提供盡在《彩報》:http://win.on.cc/football/ 
周日(13日)晚英超賽事,李斯特城憑新加盟嘅卡斯泰尼開紀錄,以及占美華迪12碼梅開二度,作客以3比0大勝西布朗,新球季有個好開始,至於今季3支升班球隊富咸、列斯聯及西布朗於首輪全數落敗。
李斯特城比較慢熱,英超最老金靴占美華迪早段甚少掂波,戰至36分鐘一次攻門,哈維班尼斯2度近門勁射,均被西布朗門將森莊士東擋出,反而今仗排451嘅西布朗不但防守嚴密,防反速度都唔弱,哥林羅賓遜埋門對狐狸防線構成一定威脅,上半場互無紀錄。
下半場李斯特城發動攻勢,56分鐘丹尼斯普拉特左路底線傳中,由阿特蘭大加盟嘅卡斯泰尼近門頭槌建功成1比0,今場係呢住24歲比利時國腳英超處子戰,首戰即入波對佢日後發展好有幫助。
狐狸入波後成隊生晒,西布朗則陣腳大亂,73分鐘占美華迪禁區內被侵犯博得12碼,佢親自主射建功,李斯特城贏到2比0。賽事末段西布朗散晒,84分鐘李斯特城再獲12碼,占美華迪操刀順利起孖,狐狸最終大勝3比0完場。