J神翻生！英超全能首演打爆熱刺

即上韓職刨績王：https://win.on.cc/football/league/kd1/rank.html　

今夏大事擴軍嘅愛華頓，周日(13號)晚英超作客熱刺小勝1比0，大牌新兵占士洛迪古斯(J神)鹹魚翻生，用全能表現帶領「拖肥糖」全取3分。

愛華頓今場盡派3位新加盟中場上陣，防中杜哥利同阿倫盧利奧成功統治中場，占士洛迪古斯就成為愛華頓核心，球隊大部份攻勢都係經由呢位哥倫比亞國腳發動，雖然55分鐘出現嘅全場唯一入波，係老拍播盧卡斯迪治尼助攻卡維特利雲攻入，但3位中場新兵嘅表現仍獲一致肯定。

現年29歲嘅占士洛迪古斯，近年喺皇家馬德里同拜仁慕尼黑都表現麻麻，上季喺西甲更淪為大後備，不過曾經兩度共事嘅安察洛堤明顯有「J神」本說明書，而「J神」今場數據亦相當精彩，5次創造機會係全場最高，亦係自阿歷斯山齊士2014年為阿仙奴首演後，英超第1個球員喺「地標戰」創造至少5次機會。除咗進攻交足貨之外，「J神」今場更罕有交出4次堵截傳波，多過晒熱刺任何一個球員。

安察洛堤賽後對愛將大為讚賞：「占士洛迪古斯只係練咗3、4日波，有咁嘅表現真係非常犀利，不過我其實唔係太意外，因為呢個就係佢球場上面嘅水平。」