燒錢無罪　林柏特反擊高普抽水

足球博彩神器，每日重心提供盡在《彩報》：http://win.on.cc/football/　

當世界球壇受到新冠肺炎疫情打擊，隊隊都勒緊褲頭過日子，車路士今個夏天就用2億英鎊買人，英超冠軍利物浦領隊高普日前就抽水，指「紅軍」唔似車仔有大水喉照住，可以無視疫情影響瘋狂燒錢：「有啲球會就係可以漠視不明嘅前景，佢哋由國家擁有、由寡頭擁有，佢哋唔係一般嘅球會，利物浦唔可能短時間內改變，扮成係車路士咁樣。」

對於高普嘅言論，車路士領隊林柏特就反應激烈：「唔需要玩數學，我哋都知利物浦嘅買人使費一直都係高水平，高普喺過去4、5年買人都係極度成功，事實證明近年英超捧盃球隊，都要用高價買入啱用嘅球員，華基爾雲迪積克、艾利臣比加、法賓奴泰華利斯、拿比基達、穆罕默德沙拿同沙迪奧文尼，全部都係好球員兼且身價高昂，車路士只係喺禁買令之後，用自己方法提升球隊實力，非常公平。」

利物浦用天價出售菲臘比古天奴嘅收入嚟買球星，車路士上季同樣以1億歐元出售夏薩特，加上之前2個轉會窗都未有買人，高普今次抽水嘅理由似乎唔夠力喎！