德國盃多蒙特大炒對手　17歲小將勁搶鏡

即上韓職刨績王：https://win.on.cc/football/league/kd1/rank.html　

多蒙特周二(15號)凌晨喺德國盃作客丙組嘅杜伊斯堡，首次穿上蜜蜂波衫上陣嘅英格蘭17歲天才小將祖迪比寧咸，表現搶鏡，為球隊射入一球，以17歲77日之齡打破紐尼沙軒紀錄(17歲82日)，成為多蒙特史上最年輕入球球員；而養傷7個月復出嘅隊長馬高列奧斯亦為多蒙特見功，帶領球隊大勝5比0。

查頓辛祖喺14分鐘射入12碼就幫多蒙特展開入球騷，跟住有17歲嘅祖迪比寧咸表現突出，令對方防守及門將都相當忙碌，30分鐘為多蒙特射入今季個人首個入球，已經令多蒙特領先至2比0，隨後喺對手打少個嘅情況下，再有杜根夏薩特、基奧雲尼雷拿以及傷愈復出的隊長馬高列奧斯各入一球，向杜伊斯堡共送5蛋晉級。

選擇去德國搵食嘅祖迪比寧咸，係屬於伯明翰青訓產品，曾被稱讚為「神一般的誕生」，因為佢上季先至獲提升一隊，立即成為主力，以16歲零38日成為伯明翰史上最年輕一隊球員，上季佢首次為伯明翰喺英冠上陣已有入球，仲成為年輕嘅入球球員；呢場佢嘅表現已令多蒙特相當滿意，睇嚟跟住仲有大把發揮機會。