武藤嘉紀被喜鵲放棄 加盟伊巴好事近

2020年09月15日 18:05
東網電視
更多新聞短片
(Getty Images)
足球博彩神器,每日重心提供盡在《彩報》:http://win.on.cc/football/ 
紐卡素賽季積極增兵,難免有部分球員要被清洗,其中開咧首戰連球隊大軍名單都入唔到嘅日本前鋒武藤嘉紀,就即將離開呢支英格蘭北部球隊,去西甲另謀出路,據報佢將以租借身份加盟伊巴,同乾貴士再做隊友。
2018年由緬恩斯轉投紐卡素嘅武藤嘉紀,過去僅為「喜鵲」英超上陣25次,其中得7次喺正選出戰,只係入得1球,表現未如理想。紐卡素季前已經引入英格蘭前鋒哥林威爾遜,加上領隊布魯士早前已經講到明,有5位棄將需要離開球隊,其中就包括呢位日本國腳。據《天空體育》報道,紐卡素已經同西甲球隊伊巴傾掂數,將會畀28歲嘅武藤嘉紀以借將身份加盟一季,依家只係等體檢過關就可以成事。
西甲開鑼戰以0比0賽和切爾達嘅伊巴,已經有乾貴士呢位日籍兵在陣,佢2015年加盟以來,已喺西甲站穩陣腳,今次有望同武藤嘉紀再做隊友。除咗佢兩位之外,現時仲有另外兩位東瀛猛將踢緊西甲,包括今季租借加盟維拉利爾嘅久保建英,同埋帶領升班球隊侯爾斯卡重返西甲嘅岡崎慎司。