【官宣】奧巴美揚續約大玩現場直播

即上韓職刨績王：https://win.on.cc/football/league/kd1/rank.html　

阿仙奴周二(16號)官方宣布，王牌前鋒奧巴美揚正式同球會續約3年，據報基本周薪為25萬英鎊，不過合約仲有唔少獎金同浮動條款，例如入球數字、球會成績、忠誠獎金等等，最高周薪有機會去到同奧斯爾睇齊嘅35萬英鎊，雖然人工極高，不過以呢位加盟後上陣111場入72球前鋒對阿仙奴嘅重要性，呢筆高薪亦係物有所值。

阿仙奴對今次續約亦隆重其事，破天荒喺續約現場玩現場直播，由奧巴美揚喺酋長球場上親自宣布續約消息，而且奧巴美揚仲即場開Live同球迷互動，包括拿卡錫迪等隊友，以及球會名宿伊恩胡禮都有現身祝賀。

奧巴美揚表示：「我續約啦！阿仙奴係我嘅家，我想成為球會嘅傳奇，我希望喺呢度製造傳奇故事。」《天空體育》消息指奧巴美揚今夏收到國際米蘭同巴塞隆拿斟介，但最終都決定留低，呢位加蓬射手透露領隊阿迪達嘅游說係佢做決定嘅關鍵。