曼聯11人上陣成疑!連格或擔正

2020年09月16日 16:02
東網電視
更多新聞短片
(Getty Images)
曼聯將於周六(19日)深夜出戰今季首場英超,主場對水晶宮,但紅魔鬼爆出不利消息,根據英國《曼徹斯特晚報》爆料,曼聯有11位球員受到各種原因影響,可能缺陣今場比賽,領隊蘇斯克查甚至可能焗用一度面臨被踢走嘅連格擔任正選。
曼聯因為有份踢上屆歐霸盃4強,獲得延後1星期出戰英超,但備戰時間仍然不足,多位球員之前未能如期歸隊操練。
保羅普巴早前因為確診新冠肺炎,需要隔離,周一(14日)先至歸隊。尼曼查馬迪、桑馬達、費特洛迪古斯、雲比沙卡、艾歷拜利都因為由外地返回英國,需要隔離14日,同樣周一(14日)先至復操,意味呢位6人只有5日時間訓練。
中場球星波基斯費南迪斯因為陪太太生BB,上周六(12日)先至歸隊,同樣未必有足夠狀態應付比賽。
新星格連活特早前為英格蘭服役期間「帶女返酒店」被踢出國家隊,佢返回曼聯後,只能獨自操練,狀態成疑。
杜安薛比仍然養傷,菲爾鍾斯剛傷愈,估計未可以上陣,後備門將羅美路仲未歸隊,好可能轉會。
比較確定會正選上陣嘅球員得拉舒福特、哈利馬古尼、勞基梳爾,新兵雲迪碧克亦可能擔正。