打多2個先識贏 熱刺強陣砌歐霸樣衰晉級

20200918
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
歐霸盃第2圈外圍賽周五(18號)凌晨上演,一眾名球隊如熱刺、AC米蘭、禾夫斯堡、加拉塔沙雷等悉數晉級,不過英超勁旅熱刺就贏得勁樣衰,佢嘅作客名不經傳嘅保加利亞球會普夫迪夫火車頭,派出全部正選上陣,都要靠對手9人應戰之下先至喺最後10分鐘絕地反勝,表現差勁。
熱刺今屆歐霸盃要由第2圈外圍賽打起,要過3關先至可以躋身分組賽,普遍認為對於實力強橫嘅熱刺嚟講,外圍賽只係例行公事,勢估唔到第1場波就幾乎出事。熱刺今場盡遣哈利卡尼、孫興民、盧施素等主力擔正,不過演出極唔對路,去到71分鐘更被主隊偷襲得手先輸1球。
延伸閱讀:【Booking曝光!巴利今日高球場簽約熱刺?】
熱刺最後階段靠主隊「自爆」反勝,火車頭球員艾美達門前用手救波,食紅牌兼輸12碼,隊友卡拉加倫亦因為投訴過激拎第2張黃牌被逐,哈利卡尼喺80分鐘操刀12碼追成平手。熱刺趁對手踢少2個,85分鐘再有尼當比利近門射入反勝一球,帶領熱刺2比1險勝,下一圈會作客馬其頓球會舒肯迪捷。