Booking曝光！巴利今日高球場簽約熱刺？

即上韓職刨績王：https://win.on.cc/football/league/kd1/rank.html　

威爾斯球星加里夫巴利回歸熱刺近在咫尺，英國傳媒報道呢位球星周五(18號)將飛抵倫敦簽約，呢個消息亦獲倫敦高爾夫球俱樂部Hadley Wood「證實」，事關俱樂部嘅Booking顯示，英國時間周五1:52pm時段，個場已經由加里夫巴利Book咗，而且同一時段預約者仲有熱刺主席利維同熱刺首席球探希根，Hadley Wood亦位於熱刺訓練場附近。

西班牙傳媒指加里夫巴利周四已經同皇家馬德里隊友告別，有網民質疑呢個「高爾夫約會」係咪「P圖」惡作劇，而Hadley Wood官方twitter就作出暗示，發文表示：「從來未試過用咁多星期五下午茶時段嘅預約查詢」，帖文其中一個Hashtag更用咗「巴利回歸」(#BaleBack)，似乎畫公仔都畫到出腸。

由於加里夫巴利之前已經參加過皇家馬德里操練，並且喺飛英國前5日內接受過新冠肺炎檢測並呈陰性，作為「精英運動員」嘅佢將可以豁免入境後嘅14日隔離，意味佢可以隨時去打Golf，如果趕及周五註冊，更可以喺周日晚作客修咸頓嘅英超賽事上陣。