意甲神鋒大執位　3方交易祖記簽迪斯高

即上韓職刨績王：https://win.on.cc/football/league/kd1/rank.html　

意大利多個媒體證實，祖雲達斯、羅馬同拿玻里已就一單重磅「3方交易」達成共識，祖記將會獲得羅馬前鋒迪斯高加盟，拿玻里就會同波蘭射手米利克續約，並即時將佢外借去羅馬，預計可以趕及意甲周六(19號)開鑼前正式落實，祖雲達斯同時亦宣布同希古恩達成解約協議。

據《天空體育》報道，祖雲達斯已同意1,500萬歐元，收購羅馬前鋒迪斯高，呢位波斯尼亞前鋒將簽署年薪750萬歐元豐厚合約，消息指呢單交易其實早就傾掂，不過羅馬要先簽到米利克先肯放人，原本米利克抗拒轉會羅馬，但周五(18號)經過長達5個鐘頭嘅會談後，米利克終於答應轉會，令呢單3方交易可以進行。米利克同拿玻里嘅合約到2021年完結，據報佢會先同拿玻里續約到2022年，今季會先以借用身份加盟羅馬，而羅馬下季就會「強制性」用2,500萬歐元將佢收購。

祖雲達斯簽入迪斯高後，收購蘇亞雷斯嘅行動好大機會終止，而祖記亦官方宣布同希古恩達成解約協議，呢位阿根廷前鋒依家身處美國，預計短期內會簽約國際邁亞密。