史坦恩唔忿氣告巴塞 朗奴高文隨時冇得撈
20200918
東網電視
更多新聞短片
巴塞隆拿前教練史坦恩早前被炒後，由朗奴高文接手，不過巴塞近日就畀呢位前主帥告上法庭。《馬卡報》指出根據法律規定，如果巴塞唔同史坦恩盡快解決合同糾紛，朗奴高文將唔可以係新球季註冊同帶領球隊。
西班牙籍教頭史坦恩早前喺社交網站發聲明，認為巴塞解僱自己並不合理：「我自從8月17日被巴塞解僱之後，直到9月16日才收到第一份書面聲明，裡面明確表示球會拒絕履行當初的合約條款。」
佢表示將會考慮同巴塞對簿公堂：「我認為必須由律師來解決相關糾紛，並考慮採取法律行動，目的是保護我和巴塞合同中規定的正當權益。」
根據西班牙媒體報道，史坦恩同巴塞嘅合約仲有1年，佢希望拎到1年工資賠償，不過被巴塞方面拒絕，令史坦恩一怒之下決定提出訴訟。
另外巴塞隆拿會長巴度美奧較早前已經被大部份會員提出彈劾，如果超過16,520個有效簽名，3個月內就會啟動彈劾投票，最後達到三分之二會員同意的話，巴度美奧就需要即時下台。
目前西甲已經開鑼，巴塞隆拿將會喺27號(周日)主場迎戰維拉利爾，依家球會內部咁混亂，或多或少都會影響球員發揮！