雲迪碧克創紀錄！荷蘭DNA係曼聯捧盃保證

足球博彩神器，每日重心提供盡在《彩報》：http://win.on.cc/football/　

曼聯將於周六(19日)晚出戰今季首場英超比賽，主場對水晶宮，焦點一定係新加盟嘅雲迪碧克。預料呢位23歲中場好大機會披甲，成為紅魔鬼史上第13位上陣嘅荷蘭球員，超越法國兵，令荷蘭成為曼聯史上「第1外援」國家。

費格遜時代，曼聯已經重用荷蘭外援，而且都可以喺紅魔鬼取得偉大成就，「光頭後衞」史譚屬於曼聯1999年三冠王功臣。

雲尼斯達萊為曼聯贏過2002/03年球季英超冠軍，自己亦奪得神射手獎，10年之後，輪到尹佩斯為曼聯捧英超及神射手殊榮。

至於一代鋼門雲達沙更加為曼聯捧過4次英超及1次歐聯冠軍，甚至連荷蘭球王告魯夫嘅囝囝祖迪告魯夫都效力過曼聯4季，雖然佢當年並非主力，但都有英超冠軍獎牌落袋。

荷蘭DNA可以話係曼聯捧盃嘅保證，大家拭目以待，睇下雲迪碧克將會為紅魔鬼贏得邊個錦標。