尼達利基尼冇班落　要返母會跟操

即上韓職刨績王：https://win.on.cc/football/league/kd1/rank.html　

尼達利基尼今夏同利物浦正式約滿，目前成為自由身。據報佢將會重投恩師鶴臣懷抱，周一正式返母會水晶宮跟操，希望可以爭取一張正式合同。

水晶宮領隊鶴臣對尼達利基尼跟操表示歡迎：「佢可以喺嚟緊幾週同我哋一齊接受訓練，向水晶宮同其他球會展示佢嘅身體素質，我好高興可以畀到今次機會佢。」

尼達利基尼今年29歲，2015年因為喺修咸頓表現出色，繼而加盟利物浦，更成功入選英格蘭國家隊，而當時英格蘭領隊正正就係鶴臣。可惜之後受傷患困擾，分別背部受傷同十字韌帶撕裂，導致佢傷多過踼，只係為利物浦上陣過103場，交出2個入球同5次助攻，前年仲曾經外借去般尼茅夫。

至於被問到水晶宮之後會唔會正式簽下基尼，鶴臣認為需要睇下今年從西布朗新加盟，19歲英格蘭小將尼敦費格遜嘅康復情況：「好大程度係取決於尼敦費格遜之後幾週嘅受傷情況，球隊一直認為佢可以爭奪正選右閘位置。」

尼達利基尼出道於水晶宮青年軍，曾經喺2008年至2012年為水晶宮效力，合共上陣137場，取得1入球、7助攻。今次佢可以返水晶宮跟操，可以話係佢職業生涯最後機會。