唔使擔心？加里夫巴利膝傷抖1個月

《英超刨績王》加強版，最強數據一網打盡：http://win.on.cc/football/　

威爾斯國腳加里夫巴利回歸熱刺只係等官宣，不過呢位31歲巨星嘅熱刺「二度首演」似乎仲要等一段時間。加里夫巴利原來一直受膝部傷患困擾，熱刺軍醫為佢做體測嗰陣，發現佢有膝傷，雖然唔算嚴重，但估計都要抖1個月先可以正式復出，熱刺迷都咪話唔擔心。

能夠借用加里夫巴利呢啲大卡士，熱刺球迷梗係興奮，不過加里夫巴利近年喺皇馬經常受傷，狀態難以長期維持喺高水平，而《馬卡報》消息指出，加里夫巴利月初隨威爾斯踢完歐國聯後，膝頭出現不適症狀，所以都冇參加皇馬訓練，自2月開始只係踢過215分鐘比賽，而熱刺軍醫就證實佢膝傷要抖1個月左右。

另外，英國《太陽報》指熱刺今次借用加里夫巴利，係同皇馬共同分擔人工，熱刺1季花費為1,200萬鎊，而且如果加里夫巴利表現出色，熱刺有權將借用延長多1年，而呢位威爾斯國腳同皇馬合約2022年完結，意味熱刺2年之後有機會免費獲加里夫巴利加盟。