【官宣】西布朗急借車路士20歲小將

20200919
東網電視
更多新聞短片
《英超刨績王》加強版,最強數據一網打盡:http://win.on.cc/football/ 
英超升班馬西布朗宣佈從車路士借入年輕中場加拉格爾(Conor Gallagher),增強球隊調動嘅靈活性,將會穿上18號波衫。呢名20歲小將啱啱先同車路士續咗5年新約,繼上季之後再次畀球隊外借吸收經驗。
加拉格爾對於外借去西布朗感興奮:「我對英超有好大興趣,佢係我今個賽季想踢同成名嘅地方。」佢亦覺得西布朗好適合自己發揮:「我上季同佢哋踢過兩、三場比賽,我覺得西布朗踢法同我好接近,可以幫助我成為我想要成為嘅球員,我好高興能達成呢份協議。」
西布朗領隊比歷亦感謝前韋斯咸隊友林柏特肯放人,同時對加拉格爾讚不絕口:「我需要多謝車路士主帥林柏特,佢喺英冠表現出色,上年1月份已經想簽佢,加拉格爾可以為球隊中場注入動力,我對他寄予厚望。」
英格蘭U21國腳加拉格爾可以出任中前場多個位置,上年頭半季先被外借去英冠查爾頓,後半季再外借到另一支英冠球隊史雲斯,分別替查爾頓上陣26次,取得6入球同4助攻,另外替史雲斯上陣21次,亦交出7次助攻,表現突出。
西布朗上場英超開鑼戰以0:3大敗李斯特城,預計加拉格爾今晚對愛華頓會先放後備席,有機會後備上陣。