輸8球唔代表廢　利物浦接觸史浩克中堅

《串績王》新登場，最強博彩盤路過關神器：http://win.on.cc/football/　

史浩克04在德甲開鑼戰喪吞拜仁8蛋，防線如同豆腐，照計佢哋班球員都冇人吼。咁又未必，德國傳媒披露，利物浦除咗斟緊狼隊前鋒迪亞高祖達，仲與史浩克04有聯繫，主要係接觸該隊中堅奧辛卡巴克。

首仗大敗之後，史浩克04已經畀網民嘲笑做「史浩克08」，而該仗吞8蛋敗仗當中，20歲土耳其中堅奧辛卡巴克以正選上陣，並踢足全場，8球慘案佢係第一身全程直擊，而且不時見佢同羅拔利雲度夫斯基短兵相接添。

據德國記者Chris Williams披露，利物浦正在物色中堅，奧辛卡巴克係潛質新星，身價有機會達到2000萬歐元甚至更高，雖然史浩克管理層暫時無意改變陣容，但如果球員賣到好價錢，史浩克在財政緊縮下，估計亦無法留住好球員。

報道指利物浦現時有華基爾雲迪積克、祖高美斯及祖爾麥迪比3個中堅，不過高普仲想增兵，當喺防線買多個保險。