蘇斯克查排錯陣 曼聯英超首戰不敵水晶宮

2020年09月20日 02:29
東網電視
更多新聞短片
(Getty Images)
《串績王》新登場,最強博彩盤路過關神器:http://win.on.cc/football/ 
曼聯英超落筆打三更!周日(20日)凌晨英超,曼聯主場出擊以1比3不敵水晶宮,今季聯賽首戰即輸波。領隊蘇斯克查今場冇派新兵雲迪碧克踢正選,點知呢名荷蘭國腳後備上陣即入波,蘇斯克查排陣自然更備受質疑。水晶宮繼首仗擊敗修咸頓後再次全取3分,與較早時間贏波嘅愛華頓同樣保持2戰全勝。
今場係曼聯新一季首場英超,賽前備受關注嘅門將位置,結果迪基亞繼續獲領隊蘇斯克查信任打正選,至於新兵荷蘭中場雲迪碧克及捲入桃色風波嘅格連活特先列後備,中場除有波基斯費南迪斯及保羅普巴,丹尼爾占士及麥湯米尼亦以正選上陣。上半場開賽7分鐘,舒洛比左路傳中,安祖斯唐辛遠柱無人看管下射入,為水晶宮打開紀錄,曼聯失波後雖搶得較多控球權,但實際威脅不大,相反完半場前水晶宮一次反擊差啲得手,佐敦阿休禁區內扣過對手起右腳勁射,迪基亞擋出底線不致多失。
下半場曼聯以「綠木」格連活特入替丹尼爾占士,59分鐘「綠木」接應科素文沙傳中近門一頂斜出,係曼聯今場第1次最有威脅埋門;66分鐘,韋費特沙夏入波被判越位在先,之後曼聯用雲迪碧克入替保羅普巴,但未見成效即輸多粒,佐敦阿休射門省中域陀連迪路夫隻手,球證睇完VAR後判12碼,佐敦阿休主射雖被迪基亞救出,但球證指迪基亞喺射波前離開白界要重射,水晶宮改由倒戈嘅韋費特沙夏主射入網領先2比0。曼聯之後靠雲迪碧克完場前10分鐘追成1比2,但5分鐘後韋費特沙夏再建一功,結果水晶宮贏3比1完場。
曼聯對上5季聯賽都能旗開得勝,最近一次聯賽首戰輸波係2014/15球季,當時佢哋喺荷蘭名帥尹戈爾首季領軍下,主場以1比2不敵史雲斯,不過該季佢哋最終排第4,重奪當時失落一季嘅歐聯入場券。