瘋狂！列斯聯又製造「其他」波膽

《英超刨績王》加強版，最強數據一網打盡：http://win.on.cc/football/　

英超新升班球隊列斯聯繼首輪聯賽，以3比4不敵利物浦之後，周六(19日)晚英超又製造「其他」波膽，唯一唔不同係佢哋今場贏波，以4比3擊敗同為新升班嘅富咸。

列斯聯喺阿根廷「瘋子」主帥比爾沙領軍之下，果然夠晒瘋狂，開波5分鐘就由希達哥斯達打開紀錄，而富咸靠阿歷山大米祖域射入12碼扳平。

列斯聯繼續發動強攻，由基列治、班福特、希達哥斯達各建一功，拋離至4比1。不過，呢支神奇球隊踢法太過豪邁，領先之後並冇刻意防守，結果又失2球，僅贏4比3，有些少驚險。

賽後比爾沙豪言唔會改變主攻踢法，佢話：「必須堅持最初令自己取得成功嘅因素，而唔係將球員塞喺後場防守，如果放棄以前成功踢法，就會鑄成大錯。」不過，比爾沙亦承認後防表現欠佳，將會進行分析，諗下改善方法。

列斯聯今場「主其他」波膽有40倍，佢哋下場作客錫菲聯，大家可以留意一下「其他」波膽。