麥巴比復出 PSG大破尼斯洗頹風

2020年09月20日 21:15
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
周日(20日)晚法甲頭場,班霸巴黎聖日耳門(PSG)有王牌基利安麥巴比復出,結果靠佢上半場直接及間接建功,加上馬昆奴斯哥利亞換邊後錦上添花,作客以3比0擊敗尼斯,聯賽2連勝重返正軌。
基利安麥巴比係PSG早前確診新冠肺炎7子之中最遲復出,由於另一王牌尼馬今場坐波監,麥巴比復出正好係及時雨。上半場雙方以快打快,尼斯名氣雖然不及對手,但踢落冇怯場,幾次遠射都考起PSG門將基羅拿華斯,不過PSG始終技高一籌,上半場38分鐘,麥巴比殺入禁區被尼斯中場卡夫蘭杜林踢跌,球證直指12碼,麥巴比親自操刀射成1比0,卡夫蘭杜林係慕遜加柏前鋒馬古斯杜林細佬,亦即係法國名宿杜林嘅細囝,睇嚟臨場經驗仲要向爸爸多多學習。踢至上半場補時,麥巴比於進攻左路個人突破,推入禁區射門被擋出,迪馬利亞門前補多腳入網,半場領先2粒返入更衣室。
下半場PSG將比賽節奏拖慢,令尼斯搶番唔少攻勢,不過踢到66分鐘,迪馬利亞進攻右路開出罰球,馬昆奴斯哥利亞前柱銅頭一搖頂成3比0,最終亦以呢個戰果完場。PSG經過開季2連敗,近2場先後擊敗梅斯及尼斯全取6分,總算重回正軌。