車路士2.2億搞掂新鋼門　Kepa執得包袱

《串績王》新登場，最強博彩盤路過關神器：http://win.on.cc/football/　

英國《每日郵報》爆料，指車路士已經同雷恩達成協議，以2,200萬鎊(約2.2億港元)，收購呢支法甲球隊嘅門將艾度亞文迪，呢位28歲塞內加爾國腳將會同車仔簽約5年，成為今夏第7位上「車」嘅球員。

身高1米98嘅艾度亞文迪一星期前已經獲准去車路士接受體測，但兩間球會一度因為轉會費細節問題而叫停轉會，最終車路士同意支付2,200萬鎊固定轉會費，再加一部份浮動轉會費，成功達成協議。

法國《隊報》指艾度亞文迪已經同雷恩隊友道別，佢上年夏天由蘭斯轉投雷恩，協助球隊取得法甲季軍，雷恩上季聯賽只失24球，成為法甲失波第2少嘅球隊之一，艾度亞文迪功不可沒。

車路士1號門將阿列沙巴拿加(Kepa)近年表現欠佳，上季季尾甚至被38歲老將韋利卡巴尼路搶走正選之位，領隊林柏特簽入艾度亞文迪之後，有可能出售Kepa。另外，車仔已經將後衞沙柏哥斯達外借去熱拿亞。