車路士後防接連派膠 主場吞利物浦2蛋

20200921
東網電視
更多新聞短片
文尼今場梅開二度。(Getty Images)
《英超刨績王》加強版,最強數據一網打盡:http://win.on.cc/football/ 
周日(20日)晚英超「紅藍大戰」,車路士完半場前先有安達斯基斯坦臣被趕出場,「高薪低能」嘅門將阿列沙巴拿加又送大禮,直接交波畀利物浦前鋒沙迪奧文尼射入,跟住車仔自己又唔生性,佐真奴費路主射12碼唔入。結果紅軍憑沙迪奧文尼梅開二度,作客以2比0搞掂車仔,聯賽開咧2連勝。
車路士「德國雙箭」夏維斯同迪姆華拿夥拍美臣蒙特攻堅,利物浦則繼續以「三叉戟」穆罕默德沙拿、羅拔圖法明奴及沙迪奧文尼向車仔大門進襲。開賽雙方都試探為主,攻勢唔多到肉,不過13分鐘車仔門將阿列沙巴拿加差啲犯大錯,當時利物浦左路求其一腳踢入禁區,佢無端端輕出但又攞唔波,空門狀態下畀穆罕默德沙拿喺禁區右路扭過,傳中畀羅拔圖法明奴施射,幸畀安達斯基斯坦臣擋出底線,不致主場落後,但已經敲響警號。
車仔比較似樣嘅攻勢主要集中喺迪姆華拿身上,32分鐘佢喺中路想交波,但撞落拿比基達身上彈番畀自己,佢引球推進去禁區頂起左腳抽射,皮球只喺龍門右邊唔夠1米斜出。
不過車仔後防鬆散,喺完半場前付出代價,車仔攻門唔入之後,紅軍門將艾利臣比加快掟個波畀佐敦軒達臣,「神軒」大腳斬向前,沙迪奧文尼突破車仔後防線接應,安達斯基斯坦臣喪追下攬跌文尼,球證原本只畀黃牌,但睇完VAR後改畀紅牌,車仔臨完半場要踢少一個,雙方互交白卷。
踢多一個嘅利物浦,換邊後無耐就打開紀錄,沙拿禁區頂交波同法明奴眉來眼去,法明奴再喺右路輕輕斬波入小禁區,沙迪奧文尼一頂破網,50分鐘領先1比0。4分鐘之後,車仔阿列沙巴拿加「派膠」送大禮,接應隊友回傳,竟然漫不經意一腳交出去,畀沙迪奧文尼截到,一聲唔該又入多一粒,助紅軍領先到2比0。
車路士落後下終於成隊醒番,67分鐘美臣蒙特禁區外施射,皮球僅僅越楣而過。74分鐘迪姆華拿左路發難,殺入禁區被今場首度亮相嘅堤亞高艾簡達拿撞跌,球證判車路士獲得12碼,不過佐真奴費路主射畀紅軍門將艾利臣比加救出,想破蛋都唔得,最終輸0比2。