皇馬開季首戰和局 施丹派青年軍被質疑

2020年09月21日 12:01
東網電視
更多新聞短片
(Getty Images)
《英超刨績王》加強版,最強數據一網打盡:http://win.on.cc/football/ 
爭取衞冕嘅皇家馬德里周一(21日)凌晨出戰今季第一擊遇上傷兵滿營,作客皇家蘇斯達雙方「零」入球,0比0和局收場,主帥施丹棄用6,000萬歐轉會嘅盧卡祖域,卻派用B隊小將「加強進攻」,最終冇收穫,備受質疑。
皇馬幾位主力好似夏薩特、馬高阿辛斯奧及艾斯高等缺陣,而老將賓施馬及隊長沙治奧拉莫斯都分別嘗試進攻,卻失敗而回,當球隊最需要入球嘅時候,塞爾維亞中鋒盧卡祖域卻被棄用,只呆坐觀眾席。
皇馬全場試射16次僅有4次中目標,或者睇到德甲「蜜蜂兵團」多蒙特嘅一班年輕新星超卓表現,主帥施丹亦嘗試寄望皇馬新力軍,下半場先後換入兩個B隊小將柏加(Marvin Park)及艾比斯(Sergio Arribas)入場,等佢哋實現同皇馬一隊作戰嘅夢想,但柏加同隊友配合仍欠默契,雖然有活力但失誤都唔少,而艾比斯係89分鐘先換入,只交出一次傳球。
銀河鑑隊喺開季首場比賽只攞1分,傳媒對戰果都覺意外,並且質疑施丹今場嘅調兵,特別棄用盧卡祖域更係有點匪夷所思,反而一改作風試用U19球員,翻查施丹對上一次用青年軍已經要追溯到2018年派自己兒子盧卡登場。
施丹賽後有解釋今場用人調配,佢話唔想換入中鋒,因為唔想改變陣式,亦強調唔係針對盧卡祖域或任何人,但有傳施丹已經叫盧卡祖域轉會。皇馬下場將會對貝迪斯,睇下施丹又點變陣。