迪利阿里摩連奴決裂！PSG趁機搶人

《英超刨績王》加強版，最強數據一網打盡：http://win.on.cc/football/　

熱刺中場球星迪利阿里已經連續2場比賽，未能入選大軍名單，英國傳媒指領隊摩連奴認為呢位24歲英格蘭國腳唔符合佢嘅戰術要求，或會長期棄用，有傳法甲豪門巴黎聖日耳門(PSG)趁機搶人，計劃簽入迪利阿里。

迪利阿里對上1次為熱刺上陣，係今季首場英超對愛華頓，但踢咗半場時間就被換走，球隊最後輸0比1。從此之後，迪利阿里再冇入選大軍名單，換言之，摩連奴連後備席位都唔預佢。

最諷刺係迪利阿里缺陣之下，熱刺表現仲好，取得2連勝，包括上場大炒修咸頓5比2，證明「寸王」決定正確。

照目前情況嚟睇，迪利阿里好難重返正選陣容，為咗前途着想，或被逼離隊。英國《BBC》指PSG對迪利阿里好有興趣，因為球隊今季開局唔順，需要增兵，有意出手簽迪利阿里，提升實力。

英超轉會市場將於10月5日關閉，如果迪利阿里繼續「被消失」，恐怕離隊將成為唯一選擇。