馬天尼斯勇救12碼　維拉小勝錫菲聯

《串績王》新登場，最強博彩盤路過關神器：http://win.on.cc/football/　

阿士東維拉早前大灑金錢買人，周二(22日)凌晨英超即刻有收穫，以2,000萬鎊轉會費由阿仙奴加盟嘅達米安馬天尼斯，處子戰即勇救12碼，帶領維拉主場1比0力克10人應戰嘅錫菲聯。

阿士東維拉季前組軍積極，新兵奧尼屈堅斯、達米安馬天尼斯、馬迪卡殊都正選上陣，又成功同基亞利殊、泰朗明斯2位英格蘭國腳續約，今場12分鐘就有人數優勢，錫菲聯後防艾根因用手拉住單刀嘅奧尼屈堅斯，被球證用紅牌驅逐。錫菲聯36分鐘本來有機會領先，基斯巴森禁區內博到12碼，但隆特史譚射門被達米安馬天尼斯成功捉路撲出。

大難不死嘅維拉63分鐘憑一對中堅合作建功，泰朗明斯接應角球頭槌二傳，安斯干沙就頂入全場唯一入波，為維拉全取3分。維拉領隊甸恩史密夫賽後讚揚達米安馬天尼斯：「呢單係一宗好好嘅收購，達米安馬天尼斯知道點樣為大球會效力，而我認為維拉都係一間大球會。」