伊巴謙莫域認老威力減半　只係入得2球！

足球博彩神器，每日重心提供盡在《彩報》：http://win.on.cc/football/　

周二(22日)凌晨意甲大戰，AC米蘭主場以2比0擊敗博洛尼亞，順利打響新季頭炮，38歲不老神鋒伊巴謙莫域繼上場歐霸盃外圍賽入波後，今場又包辦球隊2個入球，認真神奇！

今夏同AC米蘭續約1年嘅伊巴謙莫域，38歲高齡仍然展示出世界頂尖前鋒威力，今場35分鐘以驚人彈跳力頭槌破網，下半場再操刀12碼梅開二度，AC米蘭亦憑呢兩個入波贏2比0。伊巴謙莫域對上一次喺聖西路球場入2球，已經要數到2012年5月嘅「米蘭打吡」，之後佢轉戰法甲、英超同美職，時隔3,065日之後再次喺個舍AC米蘭主場入2球。

伊巴謙莫域賽後貫徹佢「寸嘴」本色：「我狀態好好，呢場係今季第2場正式比賽，本來我可以入更多波，如果我依家係20歲，應該可以入多2球！」博洛尼亞教練米赫洛域賽後就話：「今場其實勢均力敵，不過AC米蘭有伊巴謙莫域而我哋冇，呢個就係分別。」