又嚟料!神戶勝利船連續4年季中換帥

20200923
東網電視
更多新聞短片
《串績王》新登場,最強博彩盤路過關神器:http://win.on.cc/football/ 
日職神戶勝利船又開啟季中換帥模式,德國籍主帥芬克以想見屋企人為由,喺星期二正式宣布辭職,令神戶保持近4季以嚟,年年季中易帥嘅「優良傳統」,盛傳前日本國家隊教頭艾古爾會接掌教鞭!
突然「愛回家」嘅芬克,算得上係神戶近3季比較成功嘅主帥,舊年6月上任嘅佢,年初領軍贏得日皇盃及日超盃,但係聯賽持續不振,最近7戰不勝,應驗咗佢喺日聯盃0比6慘敗川崎前鋒腳下嘅一番賽後評,當時芬克話:「輸一場0比6,點都好過輸6場0比1吖。」結果喺聯賽7戰只得4和3負之後,佢不得不因為「思鄉」返屋企,陪埋芬克一齊「衣錦還鄉」嘅仲有成個教練團,神戶亦創造出4年13度換主帥嘅「輝煌戰績」,目前強化部主管三浦淳寛擔任暫代監督。
日媒盛傳決心「巴塞化」嘅神戶,可能聘用2014年日本國家隊主帥艾古爾執教,呢位61歲西班牙人喺2015年2月因為亞洲盃戰績欠佳,並且被指喺西甲期間帶領薩拉戈薩護級時,涉嫌打假波,被迫提前解約。
經歷巨變嘅神戶勝利船,周三晚6點喺日職主場出戰鳥棲砂岩,反而踢得更加醒神,以4比3擊敗對手,開出35倍「主其他」波膽。