英雄式告別　查維馬天尼斯回歸畢爾包

《串績王》新登場，最強博彩盤路過關神器：http://win.on.cc/football/　

拜仁慕尼黑有羅拔利雲度夫斯基、湯馬士梅拿、基拿比同利萊辛尼等入波高手，賽前相信冇乜人估到，歐超盃嘅冠軍英雄竟然會由老將查維馬天尼斯擔當，據報呢位32歲老將已經非常接近離隊，將會重投母會畢爾包懷抱，今場入波捧盃，可以話係佢對呢間效力8年嘅球會，最佳嘅告別禮物。

查維馬天尼斯喺2012年由畢爾包加盟拜仁慕尼黑，2013年歐超盃入波兼捧盃係佢其中一個最輝煌時刻，不過近年上陣時間不斷減少，上季德甲只係踢過6場正選，離隊事在必行。較早前查維馬天尼斯同畢爾包傾掂2+1年合約，計劃係約滿退休後喺畢爾包做埋教練。

由於查維馬天尼斯轉會在即，佢有份喺歐超盃落場亦頗令人意外，最後做埋絕殺英雄更加難以想像，查維馬天尼斯賽後表示：「我一日著住拜仁嘅波衫，都會盡力去捍衛呢支球隊。」據德國《踢球者》報道，拜仁原本為轉會索價1,000萬歐元，不過依家答應減價到800萬歐元，符合畢爾包嘅收購價位。