烏拉圭幫！馬體會想簽埋卡雲尼、托拉拿

《串績王》新登場，最強博彩盤路過關神器：http://win.on.cc/football/　

馬德里體育會成功免費簽入蘇亞雷斯，被視為「執到寶」嘅一單著數交易，據報教練施蒙尼仲未收手，打算簽埋蘇亞雷斯國家隊隊友卡雲尼同盧卡斯托拉拿，組成烏拉圭三劍俠！

據足球網站《Goal》爆料，馬德里體育會簽入蘇亞雷斯後，仍然有意向自由身嘅卡雲尼開出1年合約，不過前提係要賣走迪亞高哥斯達，先至可以承擔卡雲尼接近1,000萬歐元嘅年薪。現年33歲嘅卡雲尼同蘇亞雷斯喺國家隊合作無間，被譽為世界其中一對最出色前鋒組合，馬體會依家有機會唔使畀轉會費就簽晒2人，認真識玩。

另外，馬體會亦正斟介阿仙奴嘅烏拉圭中場盧卡斯托拉拿，呢位24歲防中已被「兵工廠」掛牌出售，轉會費約2,000萬英鎊，消息指馬體會打算先借用1年，而阿仙奴就想即刻將佢賣走套現，兩間球會目前仍進行商討。