巴塞官宣古天奴留隊　7號讓畀基沙文

足球博彩神器，每日重心提供盡在《彩報》：http://win.on.cc/football/　

一直被視為清洗對象嘅菲臘比古天奴，在拜仁結束外借返回巴塞隆拿後，獲新任主帥朗奴高文留用，古仔亦好識做，決定讓出佢一直穿着嘅7號波衫畀基沙文，自己就改穿14號，佢會擔任左中場。

古天奴於2018年1月由利物浦加盟巴塞，當季佢着巴塞7號，一季半之後古天奴被外借到拜仁，巴塞同時由馬體會簽入基沙文，雖然基沙文喺馬體會及法國隊都係7號仔，但佢加盟巴塞時，7號仲係古仔，當時基沙文揀咗17號。

古仔被外借後，巴塞上季就冇人着7號。來到今季，古仔返回巴塞，其實佢仍然係巴塞7號擁有者，但佢選擇放棄，讓咗件7號畀基沙文，自己就揀咗14號，或者佢覺得，上季外借去拜仁連捧3隻盃已經賺凸，8:2屠殺巴塞佢仲入咗2球，返到嚟讓出7號，算係賣個人情啦。