車仔「綠帽俠」　畀錢女友同阿仙奴球員爆房

《英超刨績王》加強版，最強數據一網打盡：http://win.on.cc/football/　

英超向來特別多桃色醜聞，據英國《每日星報》爆料，一名車路士球星慘戴「綠帽」，Model女友竟然暗中搭上阿仙奴球星，就連偷食「爆房」嘅酒店錢都由該車路士球星埋單，呢頂帽真係由頭笠到落腳趾尾！

《每日星報》未有公開呢段「三角關係」入面男女主角身份，但指車路士球星嘅女友係Model，兩人今年初認識後拍拖，今個夏天更專登飛嚟倫敦同男友見面3日，車仔球星包晒酒店、機票、飲食同Shopping，仲安排埋司機服侍，勢估唔到女方趁佢參加車路士練習，竟然偷偷同一名阿仙奴球星鬼混。

報道指兩位車仔同阿仙奴球星，喺報道未曝光前完全唔知女方同另一球員嘅關係，傻更更咁畀女Model玩弄於股掌之中，據知情人士透露：「個女仔一腳搭兩船，但2個球員乜都唔知，佢哋一直用短訊要求見面，結果個女仔兩個都見晒！個女仔覺得自己年輕兼單身，有權同任何人約會，但係當下次阿仙奴同車路士嘅倫敦打吡，情況肯定會好有趣。」