維拉大炒富咸！創一項「威水」紀錄

《英超刨績王》加強版，最強數據一網打盡：http://win.on.cc/football/　

周二(29日)凌晨另1場英超比賽，阿士東維拉作客以3比0大勝新升班嘅富咸，近27場英超作客第1次冇失波，可以話係維拉近年「最難得成就」。

今場開波僅4分鐘，阿士東維拉就由中場球星基亞利殊凌空射入打開紀錄，9分鐘之後侯利漢尼建功，迅速開拉紀錄至2比0。

下半場開賽只係3分鐘，維拉再由中堅泰朗明斯接應罰球射入，送夠3隻蛋畀富咸。維拉中場約翰麥甘尼今場貢獻2次助攻，表現亦可圈可點。

阿士東維拉對上1次英超作客不失球，已經係2016年1月同西布朗打和0比0，相隔4年幾之後終於再次保持作客清白之身兼贏波，的確難能可貴。至於富咸英超開季之後3場輸晒排包尾，恐怕隨時得1季貨仔又要返回英冠。