咩話！曼聯買唔到辛祖　轉簽英冠兵

《英超刨績王》加強版，最強數據一網打盡：http://win.on.cc/football/　

曼聯一直想收購天才翼鋒查頓辛祖，但遲遲未能同佢所屬球會多蒙特傾掂轉會費問題，英國《電訊報》指曼聯領隊蘇斯克查已經做定第二手準備，如果買唔到查頓辛祖，就會轉簽英冠球隊屈福特嘅翼鋒伊斯美拿沙亞。

伊斯美拿沙亞上年夏天以3,000萬鎊轉會費由法甲球隊雷恩加盟屈福特，成為屈福特史上最高身價球員，呢位22歲塞內加爾國腳上季英超上陣28次，射入5球。

屈福特不幸降班之後，可能需要出售伊斯美拿沙亞，以減輕財政壓力，希望可以賣到4,500萬鎊，早前已經有傳利物浦想收購佢，但之後簽咗狼隊嘅迪亞高祖達。

曼聯少咗利物浦競爭之後，收購伊斯美拿沙亞嘅成功機會大增，紅魔鬼2年前都試過簽入英冠球員，當時向史雲斯收購威爾斯翼鋒丹尼爾占士，效果並唔差，依家再買英冠兵並唔出奇。

不過，曼聯頭號目標仍然係查頓辛祖，伊斯美拿沙亞最終能否成魔，就要睇下查頓辛祖去向。