【有片】普巴驚世罰球！曼聯大勝殺入8強

東網電視

(Getty Images)

立即去片睇保羅普巴射入精彩罰球https://bit.ly/30kyaEC　

周四(1日)凌晨英聯盃16強賽事，曼聯以副選出擊，反而表現更出色，作客以3比0大勝白禮頓，晉身8強。後備上陣嘅紅魔鬼球星保羅普巴更加射入1個精彩罰球，證明身價。

兩隊剛於上輪英超交鋒，曼聯靠補時9分鐘博到12碼險勝3比2，今場再碰頭，紅魔鬼主帥蘇斯克查對正選陣容作出10個變動，只有中堅域陀連迪路夫繼續上陣。

曼聯一班副選大踢爭氣波，臨完上半場，桑馬達開出罰球，由麥湯米尼頂入打開紀錄。踢到73分鐘，新加盟嘅荷蘭中場雲迪碧克以一下巧妙後腳傳球，助攻桑馬達射入。

最精彩一幕出現喺80分鐘，保羅普巴喺禁區外左路主射罰球，擦近柱入網，白禮頓門將積臣史迪利做唔切反應，只能望住個波入網。

值得一提，呢粒係保羅普巴今季各項賽事首個入球，亦係效力曼聯以來，第1次直接射入罰球，呢位27歲法國國腳早前曾經確診新冠肺炎，今次以1球世界波，正式宣布完全康復。

另外，曼城作客亦以3比0大勝般尼，史達寧射入2球，並助攻費倫托利斯入波，換言之1人創造3球。

《英超刨績王》加強版，最強數據一網打盡：http://win.on.cc/football/　

on.cc東網