夏薩特又傷！皇馬贏波施丹都笑唔出

《串績王》新登場，最強博彩盤路過關神器：http://win.on.cc/football/　

皇馬喺周四(1日)凌晨西甲靠後備上陣嘅雲尼斯奧斯祖利亞，一箭定江山，主場以1比0擊敗華拉度列，但教練施丹笑唔出，因為中場球星夏薩特近日操練之中又受傷，預料需要抖1個月。

皇馬官網公布，夏薩特今次係右腳肌肉受傷，有皇馬隨隊記者透露，呢位比利時國腳起碼要抖3至4星期。夏薩特上年夏天以1億歐元轉會費，由車路士加盟皇馬後，已經第5次受傷，上季只上陣22場入1球，今夏更加未上陣過，情況令人擔憂。

今場屢救險球嘅皇馬門將泰拔高圖爾斯話：「夏薩特原本今個星期操練表現唔錯，期待好快可以復出，可惜又受傷，無疑係一個挫折。」

屋漏偏逢連夜雨，皇馬主力射手賓施馬腳風唔順，今季踢3場西甲都冇入波，另1位前鋒盧卡祖域表現仍然冇料到，今場踢咗58分鐘就被換走，更諷刺係入替佢嘅雲尼斯奧斯祖利亞成為入波做功臣，難怪施丹表示盧卡祖域可能離隊。