尼馬打甩歧視案！但又捲入逃稅官非

足球博彩神器，每日重心提供盡在《彩報》：http://win.on.cc/football/　

法國足總公布，經過調查之後，並冇足夠證據檢控巴黎聖日耳門(PSG)球星尼馬種族歧視，意味佢可以避過被罰停賽10場。不過，西班牙稅局指呢位巴西球星效力巴塞隆拿期間，拖欠3,460萬歐元稅款，佢仲有手尾跟。

PSG早前法甲對馬賽，雙方球員發生嚴重衝突，尼馬被揭發喺比賽中種族歧視馬賽嘅日本球員酒井宏樹，同時佢亦指自己遭到馬賽後衞艾華路蘇比朗種族歧視。艾華路蘇比朗則稱尼馬用侮辱同性戀者嘅語言鬧佢。

法國足總調查報告指，經過查問雙方球員之後，並冇足夠證據顯示尼馬同艾華路蘇比朗有做出種族歧視行為，所以兩人都唔會受處罰，尼馬可以暫時鬆一口氣。

不過，西班牙稅局公布拖欠稅款名單，指尼馬效力巴塞隆拿期間，拖欠3,460萬歐元稅款，隨時要破財。禍不單行，尼馬喺上場法甲對蘭斯比賽之中受傷，需要缺陣一段時間，肯定缺陣周六(3日)凌晨法甲主場對昂熱。