沙迪奧文尼確診　利物浦4日內2王牌中招

《英超刨績王》加強版，最強數據一網打盡：http://win.on.cc/football/　

英超冠軍利物浦證實，陣中主將沙迪奧文尼確診新冠肺炎，佢係繼西班牙中場堤亞高艾簡達拿後，隊中4日內第2個確診球員，令人擔心隊內會有更多球員中招。沙迪奧文尼同堤亞高艾簡達拿都會錯過周一凌晨作客阿士東維拉嘅英超聯賽。

利物浦官方聲明話沙迪奧文尼目前按指引進行隔離，佢只係有輕微病徵，整體健康良好，呢位塞內加爾球星之後亦喺IG報平安：「我依感覺好好，冇嚴重病徵，希望可以盡快回歸，我會變得比之前更強大，我哋會克服呢個難關。」

利物浦中場堤亞高艾簡達拿星期三確診，已錯過周中英聯盃對阿仙奴嘅比賽，領隊高普話佢會喺國際賽期後回歸球場，相隔幾日又輪到沙迪奧文尼中招，令人擔心病毒會喺隊內繼續傳播。沙迪奧文尼開季狀態大勇，近2場聯賽對車路士同阿仙奴合共入咗3球。