奧脫福大屠殺 摩連奴破倒戈魔咒

20201005
東網電視
更多新聞短片
孫興民(白衫)半場已經梅開二度。(Getty Images)
英超Big 6大戰,曼聯後防主力喺主場接連出醜,雖然開波1分鐘先打開紀錄,但畀熱刺上半場連入4球反超前,半場爆出「1:4」500倍波膽。曼聯仲有安東尼馬迪爾被罰出場,少打一人下,下半場再輸多兩粒,熱刺作客大炒6比1,領隊摩連奴自上季季中接手熱刺後,領軍4次鬥英超舊東家只得1和3負,今場贏波終打破倒戈魔咒。
開波30秒曼聯第一個攻勢已經獲得12碼,安東尼馬迪爾接應傳波於禁區被熱刺後衞達雲臣山齊士踢跌,球證直指12碼,波基斯費南迪斯一射中鵠,紅魔鬼先開紀錄。不過曼聯領先唔夠3分鐘就被追平,熱刺左路界外球開入曼聯禁區內,哈利馬古尼諗住頭槌回畀門將迪基亞點知唔夠力,搞到門前一片混亂,艾歷拜利同哈利馬古尼遲遲未能解圍,畀熱刺前鋒拉美拿搶甩,尼當比利後上快射破網追成1比1。
哈利馬古尼喺3分鐘後又出錯,佢喺中線附近推跌熱刺前鋒哈利卡尼,「哈神」一起身就快開罰球,曼聯成條防線先至如夢初醒,但今場復出嘅孫興民已經快速接應推入禁區,射破迪基亞五指關,開賽只係7分鐘,熱刺轉眼間反超前2比1。
28分鐘戰情又起變化,熱刺一次角球攻勢,安東尼馬迪爾同拉美拿互有推撞,馬迪爾忍唔住打咗拉美拿塊臉一下,球證安東尼泰萊直接畀紅牌趕馬迪爾出場,但慢鏡睇到拉美拿係先出手一個。少踢1人嘅曼聯於30分鐘後防又犯錯,艾歷拜利接應短龍門球後,喺自己禁區傳波畀熱刺球員逼甩,哈利卡尼射成3比1。
曼聯兵敗如山倒,37分鐘熱刺奧里亞右路交波穿過哈利馬古尼大細龍門入禁區,孫興民接應又射穿迪基亞大細龍門,梅開二度助熱刺遙遙領先到4比1,爆出500倍半場波膽,亦係曼聯英超史上首次半場畀對手入4球。
下半場甫開戰,熱刺又搵到曼聯缺口,50分鐘喺中場幾吓第一時間交波,再交畀殺入禁區嘅奧里亞後上射入成5比1。77分鐘再輸一個12碼,保羅普巴禁區內踢跌賓戴維斯,哈利卡尼操刀無甩拖,助熱刺6比1大炒曼聯。翻查紀錄,「寸王」自上季季中接手熱刺後,領軍4次鬥英超舊東家,包括曼聯及車路士只得1和3負,今次大炒紅魔終於吐氣揚眉。