【德甲精華】羅拔仔大四喜 拜仁執番3分

20201005
東網電視
更多新聞短片
(Getty Images)
足球博彩神器,每日重心提供盡在《彩報》:http://win.on.cc/football/ 
英超周日(4日)深夜滿地眼鏡碎,德甲班霸拜仁慕尼黑對住哈化柏林一戰同樣充滿話題,全場7個入球,最終要憑超級射手羅拔利雲度夫斯基補時絕殺,拜仁主場幸保不失,全取3分。
雙方上半場大部時間拉据,直至「羅拔仔」40分鐘破門,才展開真正對決。哈化柏林對住拜仁過去都唔太輸蝕,近7次碰頭僅輸兩場,即使啱啱擸走歐洲年度最佳球員兼射手榮譽嘅羅拔利雲度夫斯基,再喺51分鐘乾淨利落為拜仁領先2比0,但哈化柏林8分鐘後開始反擊,兩位前鋒祖安哥度巴同埋馬菲奧斯根夏各建一功追平2比2。
距離法定時間完場前5分鐘,兩隊繼續「搏拳」,上季助攻王湯馬士梅拿巧妙飛身助攻,畀「羅拔仔」完成帽子戲法,正當以為拜仁可憑3比2穩袋3分之際,哈化柏林嘅謝錫尼根簡喺88分鐘頭槌扳平,戲劇性地再度平手。
不過,故事仍未完結,「羅拔仔」喺補時階段殺入禁區被勾跌,博得12碼,自己操刀兼射入個人今仗第4個入球,為拜仁以4比3奠定勝局,就連一向冷靜嘅主帥費歷克都忍唔住激情振臂。
羅拔利雲度夫斯基今場狂轟13腳射門,入咗呢4個之後,佢喺安聯球場已累積入103球,效力拜仁嘅總入球數突破250球,出場294次入251球,寫下恐怖紀錄。
拜仁艱險地袋走3分,目前喺積分榜以2勝1負暫列第4。費歷克賽後都承認球隊要認真檢討,如果今季要衞冕仍有好多問題需要調整。
立即去睇德甲精華,片段由德國甲組足球聯賽正式授權。