肥安改造　卡維特利雲變「英倫恩沙基」

球博彩神器，每日重心提供盡在《彩報》：http://win.on.cc/football/　

愛華頓前鋒卡維特利雲今季人氣爆燈，呢位23歲前鋒最近入選埋英格蘭國家隊，周五(9日)凌晨對威爾斯嘅熱身賽有望處子上陣，雖然佢身材高大兼體能出色，同偶像杜奧巴有幾分相似，不過喺安察洛堤改造下，卡維特利雲有望成為「英倫恩沙基」！

卡維特利雲今季各項賽事6場入9球，當中有8球都係「一腳波」攻入，一針見血絕少多餘動作，安察洛堤都話佢似足昔日AC米蘭愛將恩沙基：「我教過一個好勁嘅前鋒叫恩沙基，佢入過300球波，入面210球都係一腳波。前鋒應該專注禁區之內，卡維特利雲深明呢個道理，佢有好好嘅速度、彈跳力同力量，佢喺禁區內嘅進步非常之大。」

為英格蘭處子上陣前，卡維特利雲亦自爆有煲恩沙基嘅「球王片」：「我喺YouTube睇過恩沙基嘅15分鐘影片，佢好多入波都係一腳波，而且走位非常出色，我依家仲係學習當中，安察洛堤對我幫助好大。」