卡雲尼隔離14日　首戰即倒戈鬥PSG

《英超刨績王》加強版，最強數據一網打盡：http://win.on.cc/football/　

曼聯簽入烏拉圭前鋒卡雲尼之後，唔可以「即食」，因為根據英國防疫規定，呢位33歲射手入境後，需要隔離14日，意味將無緣下場英超作客紐卡素。如無意外，卡雲尼成「魔」後首戰，最快係歐聯倒戈鬥巴黎聖日耳門(PSG)。

根據「精英運動員豁免權」，今季一直有份參加比賽及定期做檢測嘅球員，唔需要隔離14日，例如由波圖加盟曼聯嘅左閘阿歷士迪尼斯，可以立即上陣。

不過，卡雲尼自6月同PSG約滿離隊之後，成為「普通人士」，同一般入境英國嘅人士一樣需要隔離14日，趕唔切10月17日晚英超對紐卡素。

理論上，卡雲尼有望於10月21日凌晨歐聯披甲作客PSG，但由於佢已經抖咗幾個月，需要時間操練提升狀態，相信到時最多只能擔後備。

由於安東尼馬迪爾上場英超被逐，面臨停賽3場，卡雲尼要隔離14日，無緣下場對紐卡素，曼聯領隊蘇斯克查可能會將拉舒福特推前踢正前鋒。