法明奴梅開二度！巴西大勝5球

《串績王》新登場，最強博彩盤路過關神器：http://win.on.cc/football/　

周六(10日)早上嘅世界盃外圍賽南美洲賽區，巴西主場以5比0大勝玻利維亞，打響頭炮，效力利物浦嘅前鋒羅拔圖法明奴個人梅開二度，賽前一度傳出有傷嘅球星尼馬唔止正選上陣，仲貢獻2次助攻，巴西呢招「煙霧戰術」又幾有效喎。

「南美霸主」巴西開波16分鐘，丹尼路雷斯右路斬波入禁區，由巴黎聖日耳門守將馬昆奴斯哥利亞頂入。踢到30分鐘，羅拔圖法明奴接應左路傳中，近門射成2比0。

換邊後冇耐，尼馬左路傳入禁區，羅拔圖法明奴輕鬆順勢射入。跟住後備上陣嘅巴西小將洛迪高高斯右路傳中，令對手荷西卡拉斯高擺烏龍。轉個頭，尼馬左路傳中，菲臘比古天奴勁頂入網，送夠5隻蛋畀玻利維亞。