無敵幸運星！祖普莫亭拜仁首演好威水

《英超刨績王》加強版，最強數據一網打盡：http://win.on.cc/football/　

周五(16日)凌晨德國盃第1圈賽事，德甲班霸拜仁慕尼黑作客第5級別球隊FC迪倫，喺「贏硬」情況下派出多位新兵試陣，包括轉會窗完結前加盟嘅前鋒祖普莫亭、西班牙中場馬克洛卡同法國新星保拿沙亞，結果祖普莫亭大發神威連入2球，加上博埋12碼，再次證明佢有真材實料立足大球會。

31歲嘅祖普莫亭雖然踢喀麥隆國家隊，但其實佢係德國出世，喺漢堡青年軍出道，作為「勤力型」前鋒嘅從來唔係特別好波，但自2018年踢史篤城踢到喺英超降班後，佢突然行大運，先係獲巴黎聖日耳門睇中，連贏2季法甲冠軍，今夏約滿後又畀歐聯盟主拜仁慕尼黑招攬，幾乎肯定又有獎盃落袋。

祖普莫亭或者唔會係球會主力，但佢今場就用表現證明，自己都有能力立足大球會，24分鐘先接應保拿沙亞助攻禁區內鏟入，12分鐘後又博到對手禁區內犯規，由老大哥湯馬士梅拿操刀建功，祖普莫亭75分鐘再喺禁區外遠射得手，直接間接包辦晒拜仁今場3個入球。