曼城救星到！阿古路復出撼阿仙奴

《英超刨績王》加強版，最強數據一網打盡：http://win.on.cc/football/　

曼城喺英超開季戰績麻麻，頭3輪只有1勝1和1負成績，傷兵滿營係球隊表現唔好嘅主因，不過周日(18日)凌晨主場大戰阿仙奴，王牌前鋒阿古路就將會復出救駕！據阿根廷媒體《TyCSports》報道，阿古路喺國際賽期間一直喺曼徹斯特操練，原本打算喺下星期歐聯分組賽展開嗰陣復出，不過阿古路練波狀態比預期理想，日前喺隊內練習賽更加射入致勝一球，領隊哥迪奧拿會將佢列入今場大軍名單，「至少」都可以先任後備。

現年32歲嘅阿古路自今年6月受傷後，已經差唔多4個月未有正式比賽，由於曼城另一前鋒、巴西國腳加比爾捷西斯仍然養傷，如果哥迪奧拿認為阿古路未夠狀態正選上陣，好可會用英格蘭國腳史達寧客串頂上，以「無鋒陣」戰術迎戰阿仙奴。