奇兵2傳1射！PSG大勝嚇窒曼聯

足球博彩神器，每日重心提供盡在《彩報》：http://win.on.cc/football/　

周六(17日)凌晨法甲，巴黎聖日耳門(PSG)缺少尼馬、迪馬利亞等多位主力之下，仍然作客以4比0大勝尼姆，取得5連勝，除咗球星基利安麥巴比梅開二度之外，中場沙拉比亞射入1球及2次助攻，表現非常出色。

開波12分鐘，尼姆中堅蘭特爾就攞紅牌被逐，令PSG佔盡上風，新加盟PSG嘅巴西中場拉芬拿艾簡達拿首次上陣，就有助攻，踢到32分鐘傳畀基利安麥巴比，呢位法國國腳扭過門將射入空門，打開紀錄。

換邊之後，輪到另1位今季入「門」嘅意大利國腳費奧倫斯發威，佢接應沙拉比亞頭槌二傳，頂入空門。沙拉比亞之後再助攻基利安麥巴比入波，踢到臨完場前2分鐘，沙拉比亞自己都入番1球，換言之，PSG今場4個入球，有3球由呢位28歲西班牙中場創造。

PSG將於下周三(21日)凌晨歐聯主場對曼聯，沙拉比亞勢必成為紅魔鬼嘅心腹大患。