蘇B波費鬧不和!皇馬巴塞趁機搶人

2020年10月17日 13:01
東網電視
更多新聞短片
(Getty Images)
《英超刨績王》加強版,最強數據一網打盡:http://win.on.cc/football/ 
曼聯上場英超1比6大敗於熱刺腳下之後,傳出將帥不和事件,據悉中場波基斯費南迪斯不滿領隊蘇斯克查半場就換走佢,雙方曾經發生口角,英國《太陽報》指皇馬同巴塞隆拿都想趁機搶走呢位26歲葡萄牙國腳。
當時曼聯上半場落後1比4,據悉球員行入更衣室之後,蘇斯克查同波基斯費南迪斯發生口角,蘇B下半場開波前決定用費特洛迪古斯入替波基斯費南迪斯,令後者更加火滾。
英國傳媒曾經追問蘇斯克查點解換走「波費」,但佢拒絕解釋,並指換人有好多原因,已經同波基斯費南迪斯解釋咗,對方亦接受。
不過,葡萄牙傳媒指,波基斯費南迪斯認為球隊表現每況愈下,對蘇斯克查已經失去信心同耐性,加上今次事件,令雙方矛盾加深。
波基斯費南迪年初由士砵亭加盟曼聯之後,上陣26場入14球,表現出色,所以皇馬同巴塞隆拿都密切留意佢嘅情況,一旦「波費」想離隊,呢兩大西甲豪門勢必搶人。