美斯射中柱 巴塞送基達菲上榜首

2020年10月18日 13:02
東網電視
更多新聞短片
(Getty Images)
《英超刨績王》加強版,最強數據一網打盡:http://win.on.cc/football/ 
巴塞隆拿在新帥朗奴高文領軍下,周六迎來今季聯賽首敗,以0比1作客輸畀基達菲,美斯射中柱,基沙文射失單刀波;巴塞失分跌落第9,反送基達菲跳升榜首。
基達菲主場爆冷贏巴塞話題多多,西甲歷史上佢哋交手30次,巴塞只輸2次,得球係68比20,而作客比賽巴塞都贏咗11次。其實,巴塞開波已經採取主動,美斯20分鐘接應隊友橫傳,大禁區左側推射,可惜射手龍門柱,跟住30分鐘基沙文有一個單刀機會,點知射咗去太空,錯失領先機會。
巴塞入唔到波,下半場開波無幾耐就輸波,56分鐘輸個12碼,謝美馬達射入全場唯一入球,基達菲最終贏1比0,全取3分兼排名榜拍住皇馬跳升首位。值得一提嘅基達菲嘅阿倫尼安今仗多次犯規,據統計佢全場8次犯規,其中更試過手肘打中美斯,但只係攞咗一張黃牌;賽後巴塞主帥朗奴高文都忍唔住第一時間搵基達菲主帥投訴;朗奴高文賽後訪問時話阿倫尼安用粗口辱罵佢:「我同Jose講,佢哋嘅12號三番四次做出不尊重嘅行為,我唔想重覆佢講咩嘢,我唔可以接受,呢種行為喺球圈都唔認該出現。」
今場美斯都未能發揮救世主嘅角色,今季踢咗6場,巴塞2勝1和1負,睇番喺阿根廷比賽,美斯兩戰全勝,而個人數據嚟睇,美斯嘅表現令人擔心,喺巴塞嘅四場比賽只入咗一粒,巴塞想彈番上去,真係要諗諗辦法。