祖記冇C朗即失分畀魚腩　之後仲點捱呀

足球博彩神器，每日重心提供盡在《彩報》：http://win.on.cc/football/　

西、意吹冷風，西甲雙雄皇馬、巴塞隆拿一齊輸波之外，意甲王者祖雲達斯作客亦只能逼和新升班球隊克羅托內1比1，新加盟嘅費達歷高基艾沙首次上陣，就食紅牌。祖記球星C朗感染新冠肺炎，缺陣之下，球隊未來賽事都好難捱。

祖雲達斯開波12分鐘，因為中堅邦路斯禁區內犯規，被吹罰12碼，克羅托內由尼雲克禾主射入網。祖記好快扳平，費達歷高基艾沙右路傳中，艾華路莫拉達近門射入，呢位西班牙前鋒回巢之後首次入波。

不過，下半場祖雲達斯處處不順，費達歷高基艾沙踩中對手，被罰紅牌趕出場。艾華路莫拉達有1次頭槌攻門中柱唔入，佢之後試過再將個波送入網，但球證睇完VAR後，判越位在先，入波無效，其實當時艾華路莫拉達似平排多過越位，祖記就咁痛失2分。

另外，今場係祖雲達斯門將保方第650場意甲上陣，佢1995年11月首次踢意甲嘅時候，今場有7位正選隊友當時仲未出世。