米祖域敗家到暈　富咸嘔番2分

《串績王》新登場，最強博彩盤路過關神器：http://win.on.cc/football/　

周日晚（18日）英超頭場，由賽前兩支0分部隊錫菲聯與富咸正面交鋒，雙方各踢半場好波，最終富咸箭頭阿歷山大米祖域堅敗家，兩番做「12碼罪人」，最終被主隊錫菲聯逼和1:1，雖然取得今季首度攞到分，但咁樣嘔番2分出嚟，堅慘。

由於賽前冇分落袋，主隊錫菲聯於上半場一開波即搶攻，佔盡上風，先有奧利華麥貝尼近門勁頂被救出，其後一次美妙組織入波，可惜辛達貝治越位在先，慘食詐胡。易邊後富咸放心一搏，令錫菲聯陷於被動，後衞艾根更喺禁區內犯手球而被罰12碼，點知富咸王牌阿歷山大米祖域操刀竟中楣彈出，去到77分鐘，輪到盧克文先扣過辛達貝治，跟住左腳狂抽破網，打破僵局，眼見3分在望之際，米祖域返到自己禁區助守，卻愈幫愈忙侵犯對手，球證喺VAR提示下判罰12碼，錫菲聯老將比利沙柏操刀一針見血，雙方各一言和，富咸咁樣未能嘔番2分出嚟，米祖域隨時畀主帥柏加照肺。