假抗議真抽水？阿古路疑似非禮靚女旁證

《英超刨績王》加強版，最強數據一網打盡：http://win.on.cc/football/　

曼城前鋒阿古路養傷4個月之後終於復出，協助球隊以1比0擊敗阿仙奴，但呢位32歲阿根廷國腳喺比賽中，曾經向靚女旁證瑪茜，作出激烈抗議，甚至出手搭對方肩膀，被網民指責佢抽水。

當時比賽踢到41分鐘，阿古路不滿瑪茜將界外球判畀阿仙奴，立即上前作出抗議，跟住仲使出「鹹豬手」搭對方肩膀，呢位35歲靚女旁證立即彈開，明顯覺反感。

球員對裁判郁手郁腳，本身已經唔啱，通常要食牌，阿古路仲係對女旁證出手，更加惹人側目，佢冇被罰黃牌，真係好彩，但就遭到網民狠批，指佢擺明想抽水，或者可能想約瑪茜去街。

英國工黨議員羅森娜事後就喺Twitter抨擊呢位阿根廷前鋒：「阿古路以為自己係邊個？呢種行為係完全唔可接受嘅。」不過，曼城領隊哥迪奧拿就力撐阿古路，大讚佢係自己認識嘅人之中，品格最好嘅人，並冇冒犯瑪茜嘅意圖。